Նեանդերթալցիները ոչնչացել են մեծ աչքերի պատճառով

Նեանդերթալցիների եւ բանական մարդու գանգերի ուսումնասիրության արդյունքում գիտնականները պարզել են, որ նեանդերթալցիները վերացել են մեծ աչքեր ունենալու պատճառով. հայտնում է BBC-ն:

28 հազար տարի առաջ երկրագնդից վերացած այդ մարդատեսակը լքել է Աֆրիկան եւ բնակություն հաստատել Եվրոպայում: Ըստ գիտնակնների` նրանք ստիպված են եղել սովորել ավելի մութ գիշերներին, այդպիսով` նրանց աչքերը եւ ուղեղի` տեսողության համար պատասխանատու մասը մեծացել են, իսկ ուղեղի մնացած մասերը` փոքրացել:

Մինչդեռ մեր նախնիները, մնալով Աֆրիկայում, մութ գիշերներին սովորելու կարիք չեն ունեցել: Դրա փոխարեն նրանց մոտ զարգացել են ուղեղի ճակատային հատվածները, որոնք պատասխանատու են շփման համար:

Գիտնականները պարզել են, որ նեանդերթալցիների ակնախոռոչները 6 մմ-ով  մեծ են բանական մարդու ակնախոռոչներից: Տարբերությունը փոքր է, սակայն տուժել է «սոցիալական ցանցեր» ստեղծելու հնարավորություն տվող ուղեղային հատվածը:

«Նրանք էլ շատ-շատ խելացի էին, սակայն այլ լիգայում էին խաղում: Դա բավական էր, որ կշռեքի նժարը սառցե դարաշրջանում թեքվի մեր կողմը»,- ասել է պրոֆեսոր Ռոբին Դանբարը: