ՀԱԿ-ը քառակուսի անիվի էր վերածվել. Արմեն Ռուստամյան

ՀԱԿ-ը շարժումից կուսակցության վերածելու` Լեւոն Տեր-Պետրոսյանի որոշումը, ԱԺ ՀՅԴ խմբակցության ղեկավար Արմեն Ռուստամյանի կարծիքով, ստեղծված իրավիճակում հնարավոր լուծումներից մեկն էր, «որովհետեւ տարաձայնություններն այնքան շատ էին ՀԱԿ-ում, որ որոշում կայացնելն էր դառնում անհնար»:

«Եթե որոշում կայացնելն իրենք դրել են պահանջ, որ պետք է կոնսենսուսով լինի, եւ եթե այդ կոնսենսուսին երկար ժամանակ չես հասնում, նշանակում է, որ այդ կառույցը անգործություն է մատնվում, ուրեմն պետք է կարողանան հնարավոր դարձնել որոշումների կայացումը, իսկ այդ ձեւերից մեկն էլ սա է»,- Yerkir.am-ի հետ զրույցում հայտարարեց Արմեն Ռուստամյանը:

Նա վստահ է, որ կուսակցություն դեպքում ավելի են բյուրեղանում քաղաքական, գաղափարական մոտեցումները, ավելի զուգամետ են դառնում, ոչ թե` տարամետ: ՀՅԴ-ական պատգամավորը կարծում է, որ շարժումը կուսակցության վերածելը այս վիճակում ավելի ճիշտ կլինի: «Հակառակ պարագայում ՀԱԿ-ը քառակուսի անիվի էր վերածվել՝ նման կառուցվացքով»,- նկատեց Ռուստամյանը:

Դիտարկմանը, որ` 68 տարեկանում Տեր-Պետրոսյանը չմասնակցեց ընտրություններին, ինչպե՞ս է կուսակցություն ստեղծում, Ռուստամյանը պատասխանեց, որ դա անհատական հարց է, հատուկ դեղատոմս չկա: