Սահակաշվիլին խաղում է վա-բանկ, իսկ Վրաստանը գնում է դեպի նոր էթնիկ հակամարտություն

Կանգնա՞ծ է, արդյոք, Վրաստանը նոր  ազգամիջյան հակամարտության առջեւ:  Վրաստանի ժամանակաից պատմության մեջ առաջին անգամ Վրաստանի նախագահը բացեիբաց անդրադառնում է Սամցխե-Ջավախքից եկող իբր հայկական անջատողականության սպառնալիքին, ինչի համար առիթ է հանդիսացել «Միասնական Ջավախք» ժողովրդավարական ալյանսի առաջնորդ Վահագն Չախալյանի ազատ արձակումը բանտից. ըստ Regnum-ի` գրում է վրացի լրագրող Լեւան Գուդաձեն:

Հիշեցնենք, որ Սահակաշվիլին եւ նրա կողմնակիցները, մասնավորապես` նախկին վարչապետ Վանո Մերաբիշվիլին Չախալյանին ազատ արձակելը որակել էին որպես  անթույլատրելի սխալ, քանի որ վերջինս համարվում է մի շարք հանցագործությունների կազմակերպիչ եւ Ջավախքում հայ անջատողականության գաղափարախոս:

«Սահակաշվիլիի, Մերաբիշվլիի եւ «Միացյալ ազգային շարժման» այլ ներկայացուցիչների հայտարարությունները, ինչպեսեւ սպասելի էր, աննկատ չանցան վրաց հասարակության կողմից, որը հեշտությամբ ենթարկվում է ազգայնական տրամադրությունների: Վրաստանի նախագահի բարձրացրած` «հայկական անջատողականության» թեման արագ տեղափոխվեց սոցիալական ցանցեր, եւ ծայրահեղ աջ ազգայնականները բառացիորեն հեղեղեցին ինտերնետային կայքերը արմատական գործողությունների անցնելու կոչերով»,- գրում է վրացի լրագրողը` ընդգծելով, որ այդ ամենը հրահրել է երկրի նախագահը:

Ըստ Գուդաձեի` չի կարելի փաստել, որ քաղաքականապես սնանկ Սահակաշվիլին եւ նրա կուսակցությունն հետագայում եւս չեն դիմի ազգայնական գաղափարների ու կոչերի` իրեց կորցրած դիրքերը վերականգնելու համար: Նման ծայրահեղ ազգայնականությունը 1980-1990 թվականներին հանգեցրեց վրաց-օսական եւ վրաց-աբխազական հակամարտություններին:

Լրագրողը համարում է, որ երկրի նոր իշխանությունները պետք է հասարակությանը հեռու պահեն նման սադրանքներից, հակառակ դեպքում` վտանգվում են ոչ միայն Վրաստանում բնակվող էթնիկ խմբերի հարաբերությունները, այլեւ հենց Վրաստան պետության գոյությունը: