Նիկողայոս Ադոնցի երկերի շնորհանդեսը` ԵՊՀ-ում

Դեկտեմբերի 27-ին` ժամը 14:30-ին, ԵՊՀ գիտխորհրդի նիստերի դահլիճում տեղի կունենա  անվանի հայագետ Նիկողայոս Ադոնցի երկերի վեցհատորյակի գրքերի շնորհանդեսը:   

Վեցհատորյակի առաջին հատորում զետեղված են Նիկողայոս Ադոնցի պատմագիտական ուսումնասիրությունները, հաջորդ երկու հատորներում` բանասիրական և քերականական-լեզվաբանական ուսումնասիրությունները: Չորրորդ և հինգերորդ հատորներում տեղ են գտել հայ-բյուզանդական ուսումնասիրությունները և Նիկողայոս Ադոնցի հրապարակախոսություններն ու նամականին: Իսկ վերջին հատորում` հրապարակախոսություններ են Հայոց մեծ եղեռնի թեմայով:  

Ներկայացված ուսումնասիրություններից շատերը կարևոր ներդրում են ոչ միայն հայագիտության, այլև ընդհանուր պատմագիտության բնագավառում:

Երկերի վեցհատորյակը տպագրվել է ԵՊՀ հրատարակչության նախաձեռնությամբ և «Գալուստ Գյուլբենկյան» հիմնարկության հայկական բաժանմունքի աջակցությամբ:

Կլինի նաև Գրքի տոն և գրքերի նվիրատվություն` նվիրված Հայ գրատպության 500-ամյակին և ՅՈՒՆԵՍԿՕ-ի կողմից Երևանը գրքի համաշխարհային մայրաքաղաք հռչակելու կապակցությամբ:

Միջոցառմանը ներկա կլինեն ԵՊՀ ռեկտոր Արամ Սիմոնյանը, ԵՊՀ պրոֆեսորադասախոսական կազմի ներկայացուցիչներ: Հրավիրված են նաև ՀՀ կրթության և գիտության, Մշակույթի, Սփյուռքի նախարարները և  ուրիշներ: