Ալեն Դելոնը ներկա կգտնվի ″Շնորհավոր Ամանոր, մայրեր″-ի հայաստանյան պրեմիերային

Դեկտեմբերի 18-ին տեղի կունենա «Enjoy movies» եւ «AP cinema» կինոընկերությունների համատեղ արտադրության «Շնորհավոր Ամանոր, մայրե'ր» լիրիկական կոմեդիայի հայաստանյան պրեմիերան, որին ներկա կլինի նաեւ աշխարհահռչակ դերասան Ալեն Դելոնը:

Yerkir.am-ին «AP cinema» կինոընկերությունից տեղեկացրին, որ ֆիլմը բաղկացած է հինգ նովելից, որոնցից յուրաքանչյուրը նկարահանել է առանձին ռեժիսոր` Արտեմ Ակսենենկոն, Սարիկ Անդրեասյանը, Անտոն Բորմատովը, Դմիտրի Գրաչեւը, Կլիմ Պոպլավսկին: Ֆիլմը հանդիսատեսի մեծ համակրանքը վայելած «Մայրեր» ֆիլմի շարունակությունն է:

Ֆիլմը նկարահանվել է Ռուսաստանում և Ֆրանսիայում: Կինոալմանախում կտեսնեք նոր պատմություններ և նոր հերոսների նոր արկածներ` միավորված մեկ զգացմունքով` սեր մայրերի հանդեպ:

Ֆիլմում ներկայացված է 5 նովել` հումորային և հուզական, լիրիկական և կոմիկական: Յուրաքանչյուր նովել պատմում է մոր և երեխայի` երկու ամենահարազատ մարդկանց սիրո մասին: Ֆիլմի բյուջեն կազմում է 6 միլիոն դոլար, իսկ արտադրության վրա ծախսվել է 2 միլիոն դոլար:

Ի դեպ, Մոսկվայում ֆիլմի պրեմիերան տեղի կունենա դեկտեմբերի 19-ին, իսկ դեկտեմբերի 27-ից ֆիլմը էկրան կբարձրանա: