Ադրբեջանի ՄԱԿ-ի ԱԽ անդամությունը վտանգավոր չէ

Հայաստանի արտաքին քաղաքականությունը պետք է ակտիվանա ու լինի ավելի պրոֆեսիոնալ: Ավելի լավ է ՄԱԿ-ում ներկայացված լինեն դիվանագետ ներկայացուցիչներ, քան սփյուռքահայ հայտնի արվեստագետներ: Ներկայումս ՄԱԿ-ում Հայաստանը ակտիվ գործունեություն է ծավալում, իսկ Հայաստանի ներկայացուցիչն էլ գործունյա է ու ակտիվ` «ի տարբերություն նախորդի». լրագրողների հետ հանդիպման ժամանակ ասաց քաղաքագետ Ռիչարդ Կիրակոսյանը` անդրադառնալով այն հարցին, որ օրեր առաջ Ադրբեջանն ընտրվեց ՄԱԿ-ի Անվտանգության խորհրդի ոչ մշտական անդամ:

Ադրբեջանի ընտրությունը, ըստ քաղաքագետի, պայմանավորված է այս երկրի աշխարհագրական դիրքով: Եվ դա չի կարող վտանգ համարվել Հայաստանի համար. ՄԱԿ-ը կկարողանա զսպել Ադրբեջանի կողմից եկող վտանգը:

Ինչ վերաբերում է այն խնդրին, թե Ադրբեջանը կարող է ՄԱԿ-ում բարձրացնել Արցախյան հիմնախնդիրը եւ այն դիտարկել իր շահերից ելնելով, Ռ, Կիրակոսյանը անհավանական է համարում:

Նա հիշեցրեց, որ ՄԱԿ-ի Անվտանգության խորհրդի ոչ մշտական անդամ եղած Թուրքիան էլ չի փորձել այդ հարցը բարձրացնել, քանի որ Մինսկի խումբը չի ցանկանում, որ ՄԱԿ-ը մասնակցի Արցախյան հիմնախնդրի կարգավորմանը: