Ատոմակայաններում մասնագետների կարիք կա

Ազգային ժողովում էներգետիկայի բնագավառին վերաբերող ծրագրերից մեկի քննարկման ժամանակ ՀՅԴ խմբակցության պատգամավոր Արծվիկ Մինասյանը ՀՀ էներգետիկայի նախարար Արմեն Մովսիսյանին հարց ուղղեց ատոմակայանի աշխատողների  աշխատավարձերի հետ առաջացած խնդրի կապակցությամբ:

Ի պատասխան նախարարը նշեց, որ ատոմակայանի աշխատակիցների միջին աշխատավարձը 277 հազար դրամ է, նվազագույն աշխատավարձը`140-150 հազար դրամ, առավելագույնը` 550 հազար: Նախարարի հավաստմամբ` դա կրկնակի ավելի է համակարգի մյուս ձեռնարկությունների աշխատակիցների աշխատավարձերից:

Ատոմակայանի աշխատավարձի ընդհանուր ֆոնդը տարեկան 4.5 մլրդ դրամ է, իսկ աշխատակիցների` աշխատավարձերը 50 տոկոսով բարձրացնելու պահանջը կնշանակեր շուրջ 2.5 մլրդ դրամի ավելացում:

«Նրանց պահանջն, իհարկե, ճիշտ է: Ես չեմ ասում, թե մարդիկ սխալ են պահանջում, բայց նաեւ հնարավորությունների խնդիր կա: Էներգետիկան ընդամենը ենթակառուցվածք է, ու խնդիր կա վաղը մյուս օրը էլեկտրաէներգիան իրացնելու: Եթե այն չիրացվեց, ուրեմն վիճակն ավելի կվատանա»,- ասաց Արմեն Մովսիսյանը:

Նախարարի համոզմամբ` այս խնդրի առաջացման շարժառիթն այն է, որ տարածաշրջանի ատոմակայաններում մասնագետների թիվը գնալով նվազում է: