Բացահայտում

Ուսանողական այգում ծառահատումներն ու դրանց հաջորդող շինարարությունը սկսվել են դեռեւս 2009-ին` նույն ժամանակահատվածում, երբ ՀՀ արդարադատության նախարարության իրավաբանական անձանց պետական ռեգիստրի գործակալության տեղեկանքի համաձայն` այգին կառուցապատող «Արմեն» ՍՊԸ-ի հիմնադիրն է դարձել Ռուզաննա Բեգլարյանը:

«Մե՛նք ենք այս քաղաքի տերը» քաղաքացիական նախաձեռնությունը պարզել է, որ Ռուզաննա Բեգլարյանը ՀՀ նախագահ Սերժ Սարգսյանի թիկնազորի պետ Վաչե Ղազարյանի կինն է: Հենց նրան է պատկանում Ուսանողական այգում Տերյան փողոցի կողմից կառուցվող հսկայական շինությունը: Այգու տարածքում գործող փոքրիկ սրճարանը տարիների ընթացքում դարձել է մի քանի հարկանի բետոնապատ շինություն` գրավելով մոտ երկու անգամ ավելի մեծ տարածք, քան թույլատրվում է: Բացի այդ, թեեւ շինարարությունն իրականացվում է պատմամշակութային հուշարձանների պահպանության գոտում, այն սահմանված կարգով չի համաձայնեցվել ՀՀ մշակույթի նախարարության հետ:

ՀՀ նախագահի, գլխավոր դատախազի և Երևանի քաղաքապետարանի կողմից անտեսվել են 20.000 քաղաքացիների` նրանց ուղղված դիմումները, ՀՀ բոլոր ատյանների դատարանները մերժել են 116 քաղաքացիների հայցը: Սահմանադրական դատարանը մերժել է նաև քննության առնել «Մե՛նք ենք այս քաղաքի տերը» քաղաքացիական նախաձեռնության ներկայացուցիչների դիմումը:

Փաստորեն, պարզ է, թե  ինչու ՀՀ քաղաքացիներին չի հաջողվել օրինական հիմքերով կանխել Ուսանողական այգու ոչնչացումը: «ՀՀ նախագահը դարձել է Երևանում հանրային տարածքների գրավման ու անօրինական կառուցապատումների փաստացի «տանիքը»,- ասվում է նախաձեռնության տարածած հաղորդագրության մեջ: