Ոչ ոք չի կարող ասել, որ նա ինքնասպան է եղել

«Արայ» ընկերության տնօրեն Արմեն Պետրոսյանի հոգեհանգստի արարողությունը տեղի է ունեցել Ս. Հովհաննես Մկրտիչ եկեղեցում: Նշենք, որ նախնական վարկածի համաձայն` Պետրոսյանն ինքնասպան է եղել, սակայն հայտնի է, որ Հայ Առաքելական եկեղեցին չի «ընդունում» ինքնասպաններին եւ չի կազմակերպում նրանց հուղարկավորության արարողությունները:

Տեր Շմավոն քահանա Ղեւոնդյանը yerkir.am-ի հետ զրույցում նշեց, որ, այո, Արմեն Պետրոսյանի հոգեհանգստի արարողությունը տեղի է ունեցել եկեղեցում:

«Քանի դեռ վերջնական քննությունը չի ավարտվել, ոչ ոք չի կարող ասել, որ նա ինքնասպան է եղել: Մենք առաջնորդվել ենք հանգուցյալի բարեկամների վկայություններով, որոնք վստահ են, որ Պետրոսյանն ինքնասպան չի եղել»,- ասաց Տեր Շմավոնը` հավելելով, որ հանգուցյալի ձեռքի ատրճանակն ու քունքի կրակոցը դեռ չեն ապացուցում, որ մարդն ինքնասպան է եղել:

Նրա մեկնաբանմամբ` դեպքին իրենք առնչվել են իբրեւ մահվան դեպք. «Նրա հոգեհանգստի արարողությունն անցկացրել ենք որպես հայ քրիստոնյա»: