ՀԱՅԿԱԿԱՆ ԺԱՄԱՆԱԿ. Կվերագործարկե՞ն

Հոկտեմբերի 21-ին լրանում է ժամկետը, երբ Մեծամորի ատոմակայանի տնօրինությունը պետք է լուծի ազատման դիմում ներկայացրած 158 աշխատակիցների խնդիրները: Հոկտեմբերի 22-ից արդեն 158 հոգին կարող են աշխատանքի չներկայանալ:

ՀԱԷԿ-ի աշխատակիցները ազատման դիմումներ ներկայացրել էին սեպտեմբերի 20-ին՝ պահանջելով աշխատավարձի բարձրացում։  ՀՀ Աշխատանքային օրենսգրքի համաձայն` ազատման դիմում ներկայացնելուց մեկ ամիս անց աշխատանքային պայմանագիրը համարվում է լուծարված։

Թերթի տեղեկություններով` ՀՀ Միջուկային անվտանգության կարգավորման պետական կոմիտեն ՀԱԷԿ-ի տնօրինությանը ներքին կարգով զգուշացրել է, որ եթե աշխատակազմի խնդիրը չլուծվի, ապա ատոմակայանի վերագործարկումը կարող է արգելվել՝ անհրաժեշտ մասնագետների բացակայության հիմնավորմամբ։ ՀԱԷԿ-ի գլխավոր տնօրեն Գագիկ Մարկոսյանը թերթին ասել է, որ ստեղծված իրավիճակի լուծման առնչությամբ ոչ մի նորություն չունի։ Նա հերքել է ՀԱԷԿ-ը չվերագործարկելու մասին լուրերը եւ ասել, որ աշխատանքներն այնպես են ընթանում, որ հնարավոր է` ՀԱԷԿ-ը նախատեսվածից շուտ գործարկեն։ ՀԱԷԿ-ի պլանային վերագործարկումը նախատեսված է հոկտեմբերի 27-ին: