Ինտերնետը նպաստում է գրագողությանը

Ինտերնետը լայն հնարավորություններ է ստեղծում գրագողության համար եւ նպաստում է դրա տարածմանը. այսօր լրագրողների հետ հանդիպման ժամանակ ասաց հոգեբան Սամվել Խուդոյանը` հավելելով, որ ներկայացվող ատենախոսությունների մեծ մասը արտագրված են:

«Եվ այդպես տպում են գրքեր, ստանում գիտական աստիճաններ: Դա, իհարկե, սարսափելի է»,- ասաց նա:

Ըստ նրա` գոյություն ունի գրագողության երկու տեսակ` նպատակաուղղված եւ պատահական, սակայն ներկայումս հակագրագողության ծրագիր է մշակվում:

Ս. Խուդոյանի խոսքերով` հասարակական գիտությունների մեջ գրագողությունը հատկապես տարածված է իրավաբանության, մանկավարժության, տնտեսագիտության ոլորտներում:

Իսկ ըստ ֆիզիկամաթեմատիկական գիտությունների դոկտոր Արթուր Իշխանյանի` ֆիզիկայի ոլորտում վիճակը բարվոք է, գրագողությունը հասցված է նվազագույնի: «Եթե դուք մտել եւ գործում եք միջազգային դաշտում, այդ դեպքում գրագողությունն այնքան էլ հեշտ չէ, սակայն այն կարող է նկատվել բակալավրիատում ու մագիստրատուրայում»,- ասաց նա:

Մշակութաբան Արմինե Բաղդասարյանն էլ պնդեց, որ այսօր գրագողության պատճառը երիտասարդների անգրագիտությունն է, եւ ինտերնետից նյութեր գողանալը հեշտ միջոց է:

Ի դեպ, գրագողության համար քրեական օրենսգրքի 158 հոդվածով սահմանվում է մինչեւ երկու տարվա ազատազրկում: