Ադրբեջանի դարդերը

Բրյուսովի անվան օտար լեզուների ռեկտոր, քաղաքագետ Սուրեն Զոլյանը Կազանի հանդիպումից հետո կանխատեսել է, որ այդ գործընթացը կասեցվելու է, քանի որ, առաջին հերթին, խնդիրներ կան Ադրբեջանի դիրքորորշման հետ:

Այսօր լրագրողների հետ հանդիպման ժամանակ նա նշեց, որ Ադրբեջանի նախագահը հայտարարել է, որ իրենք  պատերազմը դեռևս չեն ավարտել, իսկ Հայաստանը ստեղծվել է պատմական ադրբեջանական հողերի վրա, ինչը, բանախոսի կարծիքով, սպառնալիք է հետագայի համար:

Քաղաքագետը համարում է, որ եթե երկրի ղեկավարը նման դիրքորոշում է ներկայացնում, ապա դրանից կարելի է ենթադրել, որ բանակցությունների հետագա ընթացքը կսառեցվի: Ըստ նրա` այսօր Ադրբեջանի տեսակետը փոխվել է, քանի որ ժամանակին Ադրբեջանը հույս ուներ, որ միջազգային գերտերություններն իրեն կաջակցեն ԼՂՀ-ի հարցում: «Ադրբեջանը, հաշվի առնելով իր հնարավորությունները, մտածում է, որ եթե չկարողանա խնդիրը լուծել այս տարի, ապա հաջորդ տարի, հաշվի առնելով իր հզորացումը և Հայաստանի թուլացումը, կկարողանա հարցին լուծում տալ»,- նշեց քաղաքագետը:

Նա համարում է նաև, որ կարևոր է ԼՂՀ-ում հեռանկարներ տեսնել. առաջին հեռանկարը ԼՂՀ բնականոն զարգացումն է, բայց, ինչպես նշեց Զոլյանը, այս ամենի հետ մեկտեղ կա շատ կարեւոր խնդիր ` բնակչության աճը, որը պետք է հասնի մոտ 300.000-ի:

Հարցին, որ եթե ԼՂՀ անկախությունը միջազգայնորեն ճանաչվի, ապա այդ փաստը կարո՞ղ է գործընթացի վրա դրական ազդեցություն ունենալ, Զոլյանը պատասխանեց, որ ինքը չի կարծում, որ որեւէ երկիր ներկայումս պատրաստ է ճանաչել ԼՂՀ անկախությունը: