Իրանը Ռուսաստանին դատի է տվել

Իրանը միջազգային դատարան է դիմել` հայց ներկայացնելով Ռուսաստանի դեմ այն բանի համար, որ վերջինս հրաժարվում է Թեհրան արտահանել C-300 զենիթահրթիռային համակարգերը:

ՄԱԿ-ի Անվտանգության խորհուրդը 2010 թվականին հաստատել է Իրանի դեմ նոր պատժամիջոցների կիրառման վերաբերյալ փաստաթուղթ` կապված միջուկային ծրագրի հետ: Այստեղ առաջին անգամ սահմանափակումներ են մտցվել Իրանին զինամթերք մատակարարելու հարցում, այդ թվում` արգելվել են հրթիռների եւ հրթիռային համակարգերի, տանկերի, ուղղաթիռների, ռազմական ինքնաթիռների եւ նավերի մատակարարումը:

ՌԴ նախագահ Դ. Մեդվեդեւը 2010-ի սեպտեմբերին ստորագրել է «ՄԱԿ ԱԽ բանաձեւի իրականացման մասին» փաստաթուղթը, որում նշվում է, թե արգելվում է Իրանին առաքել նաեւ C-300 հրթիռազենիթային համակարգեր:

«Իրավական տեսանկյունից մենք համարում ենք, որ C-300-ի առաքումը չի մտնում ՄԱԿ-ի Անվտանգության խորհրդի բանաձեւի մեջ: Մենք դատական հայց ենք ներկայացրել, որպեսզի դատարանի որոշումը թույլ տա Ռուսաստանին կատարել արտահանումը, որպեսզի Ռուսաստանն իրավականորեն ունենա այդ խաղաթուղթը»,- ասել է Ռուսաստանում Իրանի դեսպան Մահմուդ Ռեզա Սաջադին: