"Ժառանգությունը" սերիալներ չի նայում

Հանրային խորհրդից մինչեւ Բաղրամյան 19 (Ազգային ժողով) եւ Բաղրամյան 26 (ՀՀ նախագահի նստավայր) շատ հեռու չէ`  մետրոյով ընդամենը երկու կանգառ. «Ժառանգություն» խմբակցության պատգամավոր Արմեն Մարտիրոսյանը հումորով է արձագանքում ՀԱԿ-իշխանություն երկխոսությանը, որի առաջին հանդիպումը կկայանա այսօր:

Նրա համոզմամբ` երկխոսությունը հասարակության հետ որեւէ կապ չունի եւ հասարակության որեւէ խնդիր չի լուծում: «Ես գնում եմ Լոռու, Շիրակի մարզեր, տեսնում եմ` գյուղերը դատարկվում են: Այլ գնահատական, թե ով ինչ երկխոսություն է իրականացնում, ով ինչ գնահատական է տալիս, ինձ համար երկրորդական է»,- հայտարարեց պատգամավորը` նշելով, որ այս պայմաններում ավելորդ է խոսել երկխոսության մասին:

«Գումարելիների տեղափոխությունից գումարը նույնն է մնում, ուստի մենք պետք է ամբողջ բանաձեւն ու փոփոխականները փոխենք»,- ասաց նա:

Պատգամավորի խոսքերով` «Ժառանգությունը» համագործակցությունը պատկերացնում է բոլոր այն անձանց հետ, որոնց համար էականը ոչ թե իշխանափոխությունն է, այլ բանաձեւի փոփոխությունը` համակարգափոխությունը: Պետք է փոխվի կառավարման համակարգը, նոր Սահմանադրություն եւ նոր օրենքներ են պետք: