Համատեղ այց` Վրաստան

Վաղը Պատերազմի եւ խաղաղության լուսաբանման ինստիտուտը` «Հարեւաններ» նախագծի շրջանակներում, կազմակերպում է հայ-ադրբեջանական համատեղ լրագրողական այցելություն Վրաստան:

Նախագծի նպատակն է բացահայտել Վրաստանի երկու շրջաններում`Քվեմո Քարթլիում և Սամցխե-Ջավախքում ապրող ազգային փոքրամասնությունների` հայերի և ադրբեջանցիների խնդիրները:

Ինչպես հայտնում են ինստիտուտի հայաստանյան գրասենյակից, «Հարեւաններ» նախագիծը համագործակցության յուրահատուկ հարթակ է հայ եւ ադրբեջանցի լրագրողների համար, որը նպաստում է հակամարտության երկու կողմերի միջեւ հարաբերությունների կառուցմանը` նրանց ապահովելով համապատասխան միջոցներով, տեղեկատվությամբ եւ համագործակցության հնարավորություններով: Նախագծի նպատակն է վերացնել հաղորդակցության պատնեշները, տարածաշրջանում ստեղծել «ընդհանուր տեղեկատվական տարածք»` օբյեկտիվ լրատվության իրականացմանը խոչընդոտող տարաձայնությունները եւ նախապաշարմունքները վերացնելու համար:

Վրաստան կատարվող այցելության շրջանակներում լրագրողները կմասնակցեն դասընթացների, կհանդիպեն տեղական կառավարական պաշտոնյաների, վերլուծաբանների, փորձագետների, ազգային եւ կրոնական փոքրամասնությունների խնդիրների ոլորտում գործող ՀԿ-ների ներկայացուցիչների հետ: Եռօրյա այցելությունից հետո լրագրողներն այնուհետեւ համատեղ կաշխատեն հոդվածների պատրաստման վրա, որոնք կտպագրվեն ինչպես նրանց լրատվամիջոցներում, այնպես էլ ՊԽԼԻ կողմից հրապարակվող համատեղ ներդիրներում: