ՄԽ համանախագահները խրախուսում են Ադրբեջանին

Վերջին ամիսներին Ադրբեջանի կողմից հրադադարի խախտման դեպքերի ակտիվացումը ՀՅԴ Հայ դատի եւ քաղաքական հարցերի գրասենյակի պատասխանատու Կիրո Մանոյանը պայմանավորում է բանակցությունների ընթացքից Ադրբեջանի դժգոհությամբ:

Միջազգային հանրությունն էլ, իր հերթին, վճռական պատասխան չի տալիս այս քայլերին: «Համանախագահները ձեւական հավասարություն են դնում կողմերի միջեւ, ինչն անարդար է, նույնիսկ` վնասակար. նրանք ասում են` «ոչինչ, մենք քեզ նման նաեւ մեղավոր ենք համարում հայկական կողմին»,- նշեց Կիրո Մանոյանը: Ըստ նրա` հրադադարի խախտումների հարցում միջնորդների այս թույլ մոտեցումը քաջալերում է Ադրբեջանին, որպեսզի նա շարունակի իր քաղաքականությունը:

Լրագրողների խնդրանքով Կիրո Մանոյանն անդրադարձավ նաեւ համշենահայերի` Ղրղզստանից Ղարաբաղ վերադառնալու պատրաստակամությանը: Դաշնակցական գործիչը նշեց, որ ողջունելի է, եթե Ղարաբաղում բնակվելու ցանկություն ունեցողների թիվը մեծանա եւ պետության կողմից նրանց աջակցություն ցուցաբերվի:

 «Ցեղասպանության ժամանակ թուրքացած, իսլամացած հայերի հարցում մենք պետք է մեկ ընդհանուր կեցվածք որդեգրենք: Թեկուզ մնան իսլամ, այն մարդիկ, որոնք իրենց զգում են հայ, պետք է ողջունվեն մեր կողմից: Մենք պետք է օգնենք, որպեսզի նրանք վերաինտեգրվեն մեր հասարակությանը»,- ասաց դաշնակցական գործիչը: