Բնապահպանական բողոքի ակցիա

Մի քանի րոպեից Երեւանի Նալբանդյան փ. 106 շենքի բակում տեղի կունենա «Առանց ծառերի քաղաքն ապագա չունի» հանրային քաղաքացիական ակցիան, որի կազմակերպիչն է «Մեր քաղաքը» հանրային քաղաքացիական նախաձեռնությունը:

«Տասնամյակներ շարունակ այստեղ գործող մանկապարտեզը, որը հայտնի է որպես ՆԳՆ մանկապարտեզ, ամիսներ առաջ քանդվել է` հերթական 16 հարկանի 2 «էլիտար» շենքեր վեր խոյացնելու նպատակով: Այս ոչ ընդարձակ բակում կառուցվելիք շենքերը հարակից շենքերի բնակիչներին զրկելու են լույսից եւ առողջ կենսամիջավայրից: Քաղաքապետարանից քաղաքացիներին գրավոր հայտնել են, որ շենքի նախագիծը համաձայնեցված չէ, սակայն արդեն փորում են հիմքը` վերացնելով տասնյակ հաստաբուն ծառեր»,- իրենց հայտարարության մեջ նշել է «Մեր քաղաքը»:

Հավելենք, որ նույն հարցով բողոքի ակցիա է անցկացվել նաեւ սույն թվականի փետրվարի 24-ին, որից հետո շինարարական աշխատանքները ժամանակավորապես դադարեցվել էին, քանի որ շինարարություն իրականացնող «Ավագ շին» ՍՊԸ-ն չուներ շինարարություն իրականացնելու թույլտվություն: