Բնապահպանական բողոքի ակցիա

Վաղը Հրազդան քաղաքում տեղի կունենա բողոքի ակցիա` ուղղված երկաթաքարի հանքավայրի շահագործման դեմ:

Հանքավայրը, որը պատրաստվում է շահագործել չինական Fortune Oil ընկերությունը, գտնվում է Հրազդան քաղաքից 800 մետր և Հրազդան գետից 1,5 կմ հեռավորության վրա: Ինչպես բազմիցս նշել են փորձագետները, այն կարող է քաղաքի` ծանր մետաղներով աղտոտման եւ վտանգավոր հիվանդությունների առաջացման պատճառ դառնալ:

«Էկոլուրը» տեղեկացնում է, որ հանքաքարի արդյունահանումը նախատեսում են սկսել 2014 թվականին` տարեկան 1,5-2 մլն տոննա արտադրողականությամբ:

Ի դեպ, բոլոր երեք հանքերը, որոնք շահագործելու է Fortune Oil-ը (Հրազդանում, Աբովյանում եւ Սվարանց գյուղում), պատկանում են ՀՀ բնապահպանության նախկին նախարար Վարդան Այվազյանի որդի Սուրեն Այվազյանին եւ ՀՀ խորհրդարանի պատգամավոր Տիգրան Արզաքանցյանին: