Թուրք լուսանկարիչն ընդունում է Ցեղասպանությունը

Այս օրերին Հայաստանում է ազգությամբ թուրք լուսանկարիչ Աթթիլա Դուրաքը: Իր «Էբրու» ցուցահանդեսով նա հանդես է եկել 10 երկրների 26 քաղաքներում:

Այսօր Դուրաքը լրագրողներին ներկայացրեց իր ծրագիրը և դրա նպատակը. «Էբրուն նկարչական արվեստ է. ջրի մեջ ներկեր են լցնում, որոնք միաձուլվում են` գույները չխախտելով, այնուհետև ջրի վրա թուղթ են փռում և ստանում վերջնական պատկերը»:

Անատոլիան կամ Արևմտյան Հայաստանը Դուրաքի լուսանկարներում պատկերված է ներկայիս բոլոր մշակութային շերտերով:

Նկարիչն իր քաղաքական դիրքորոշումները ներկայացնելիս դիվանագետ գտնվեց և ասաց, որ որքան դեմ է «Թուրքիան թուրքերինն է» արտահայտությանը, այնքան էլ դեմ է, երբ ասում են, որ Անատոլիայի իսկական տերերը հայերն են:

«Երկիր»-ի հարցին, թե կարելի՞ է իրեն համարել այն թուրքերից, ովքեր իսկապես ընդունում են Ցեղասպանության փաստը, նկարիչը պատասխանեց. «Այո, 100%-ով կարող եք համարել»:

Տեղեկացնենք, որ ցուցահանդեսը կկայանա հինգշաբթի օրը ՆՓԱԿ ակումբում: