Գործընկերների հանդիպում

Այսօր ԱԺ նախագահ Աշոտ Ղուլյանն ընդունել է Մեծ Բրիտանիայի եւ Հյուսիսային Իռլանդիայի Միացյալ Թագավորության խորհրդարանի Լորդերի պալատի անդամ բարոնուհի Քերոլայն Քոքսի գլխավորած պատվիրակությանը, որի կազմում են Լորդերի պալատի անդամ բարոնուհի Շրիլա Ֆլավերը, Համայնքների պալատի անդամ Ջոն Վայթինգդեյլը և պատվիրակության քարտուղարներ Էնթոնի Աբաջյանն ու Օդեթ Բազիլը. տեղեկացնում է ԼՂՀ Ազգային ժողովի մամուլի ծառայությունը:

«Ես կարեւորում եմ մանավանդ իմ խորհրդարանական գործընկերների առաջին այցը, որոնց համար բավական հետաքրքիր է մոտիկից ճանաչել Լեռնային Ղարաբաղը, անմիջապես տեղում ծանոթանալ ձեր անցած ուղուն, տեղեկանալ հակամարտության կարգավորման ներկա զարգացումների մասին»,- հանդիպման ժամանակ նշել է բարոնուհի Քոքսը։

Շրիլա Ֆլավերի խոսքերով` շատ է լսել Լեռնային Ղարաբաղի մասին, մանավանդ` բարոնուհի Քոքսից, եւ անչափ ուրախ է, որ վերջապես կարող է բարեկամի աչքով տեսնել այն, ծանոթանալ արցախցիների կյանքին։

Իսկ Համայնքների պալատի հանձնաժողովի նախագահ Ջոն Վայթինգդեյլի խոսքով՝ ինքը մշտապես հետաքրքրվում է հետխորհրդային տարածքի հանրապետությունների կյանքով, մասնավորապես` վերջերս այդ նպատակով այցելել է Վրաստան, այս օրերին՝ Հայաստան եւ գոհ է, որ հասցրել է լինել նաեւ Լեռնային Ղարաբաղում` հնարավորություն ունենալով տեղում ստանալ իրեն հուզող հարցերի պատասխանները։