Ջրային ժառանգություն

«Էրեբունի» պատմահնագիտական արգելոց-թանգարանը եւ «ԻԿՕՄՕՍ/Հայաստան» ՀԿ-ն, միանալով «Ջրի ժառանգությունը» միջազգային նախաձեռնությանը, ապրիլի 16-ին հանդես կգան «Ժառանգությունը եւ ջուրը» թեմատիկ պաստառների ցուցադրությամբ:

Հայաստանում միջոցառումների շարքը կավարտվի ապրիլի 18-ին` ժառանգության հայ պահապանների այցելությամբ Սեւան-Հրազդան կասկադ` ՀՀ միացյալ էներգահամակարգը սնող արդյունաբերական այդ հսկան, որը պահպանվում է պետության կողմից որպես 20-րդ դարի արդյունաբերական ժառանգության օրինակ:

Այդ օրը նմանատիպ միջոցառումներ կկազմակերպվեն Կոստա Ռիկայում, Պորտուգալիայում, Կանադայում, Չիլիում եւ աշխարհի այլ երկրներում:

Մեր հարեւան երկրները նույնպես ակտիվ կլինեն: Թուրքիայի ԻԿՕՄՕՍ-ը նախաձեռնել է միջոցառումներ` նվիրված Ստամբուլի Տերկոսի ՀԷԿ-ին եւ Իզմիրի հուշաղբյուրներին: Իսկ Վրաստանում կհրավիրվի կլոր սեղան «Թբիլիսիի ժառանգության խնդիրները» թեմայով, որի ավարտից հետո մասնակիցները կընդունեն հայտարարություն` ուղղված քաղաքային իշխանություններին` Թբիլիսիի պատմական միջուկի պահպանության հորդորով: