Վանաձորում ուրիշ է

Մարտի 16-ին Երևանի ավագանին որոշեց, որ ապրիլի 1-ից մայրաքաղաքի մանկապարտեզները կգործեն անվճար:

Լոռու մարզում նման բան չի լինի, համայնքի բյուջեն այդ հնարավորությունը չունի, համենայն դեպս` առաջիկա տարիների ընթացքում: 

«Երևանի բյուջեն իր ծավալներով թույլ է տալիս նման որոշում կայացնել,- ասում է Վանաձորի քաղաքապետարանի կրթության և մշակույթի բաժնի պետ Գագիկ Աղաբաբյանը:- Քանի որ մենք երկրաշարժի գոտում ենք, բազմաթիվ ծառացած խնդիրներ ունենք` կապված նախադպրոցական ցանցի վերականգնման և պահպանման հետ»:

Նա անհամեմատելի է համարում մայրաքաղաքի և Վանաձորի բյուջեները, բացի այդ, ըստ նրա, անհամեմատելի ցածր են նաև Վանաձորում սահմանված վարձավճարները. «Թող յուրաքանչյուր ծնող նստի և հաշվարկի. 3500-5000 դրամով մեկ ամիս կարո՞ղ է պահել իր երեխային, հոգալ նրա սննդի և մնացած հարցերը: Իհարկե` ոչ: Սա ուղղակի սիմվոլիկ գումար է, կաթիլի նման մի բան, որի բացակայությունն էլ, մեր բյուջեի սուղ հնարավորությունների պարագայում, ինչ խոսք, տեսանելի կլինի»:

Այնպես որ` վանաձորցի ծնողները պետք է համակերպվեն. առաջիկայում վարձավճարների վերացման մասին խոսք լինել չի կարող, նույնիսկ հնարավոր է ավելանան:

Տեղեկացնենք, որ Վանաձորում գործում է համայնքային ենթակայության 20 նախակրթական հաստատություն, ուր հաճախում է 1700-ից ավել երեխա: