Դատարանում գործ ունե~նք, դատարանո~ւմ

Ճիշտ «Մենք ենք մեր սարերի» պես: Ոչխար էին մորթել-կերել. խեղճերին քննեցին, հետո էլ ոչխարների հոտի հետ տարան-հասցրին  դատարան:

Ոնց որ մեզ: Եղածը մեծ բան չէր, մամուլում կարդացածը վերատպել էինք` մեր վերաբերմունքն արտահայտելով: Ռեւազը կասեր՝ ես ընդհանրապես ոչխար չեմ ունեցել, որովհետեւ ոչխար ուտողները համագյուղացիներն էին:

Չգիտենք, թե ինչով մենք Արզաքանցյանի համագյուղացիները չենք (չնայած խմբագրությունում քյավառցի էլ ունենք), բայց նա համառեց եւ պահանջեց, որ դատ լինի, եւ մենք իրեն վճարենք 3 000 000  դրամ, դեռ մի կես միլիոն էլ դատական ծախսերի ու փաստաբանի համար:

Մի խոսքով՝ դատական նիստը տեղի կունենա այսօր` ժամը 12։00-ին, Կենտրոն եւ Նորք-Մարաշ ընդհանուր իրավասության  առաջին ատյանի դատարանում:

«Ինչի~ համար, ինչի~ համար»,- հարցնում էին հարեւան գյուղի հովիվները: «Ոչխա~ր ենք մորթել, ոչխա~ր», - պատասխանում էին սարի այս կողմից: