Ծիծաղաշարժ միջադեպ` խորհրդարանում

ԱԺ նիստի աշխատանքների ավարտից մոտ մեկ ժամ առաջ դահլիճում կորեացի հյուրեր կային` Կորեա-Հայաստան բարեկամության խմբի ներկայացուցիչները:

ԱԺ նախագահ Հովիկ Աբրահամյանը սկզբում ողջունեց նրանց, հետո անցավ որոշ օրինագծերի քվեարկությանը: Քվեարկվեց եւ 85 կողմ, 0 դեմ, 0 ձեռնպահ ձայների հարաբերակցությամբ ընդունվեց Վիկտոր Դալլաքյանի առաջարկած` մանկապղծության մասին օրինագիծը, ապա`  քվեարկության դրվեց «Հավաքների ազատության մասին» օրենքում փոփոխություններ և լրացումներ կատարելու մասին օրինագիծը:

Օրինագծի վերաբերյալ վարման կարգով ձայն խնդրող ՀՅԴ խմբակցության ղեկավար Վահան Հովհաննիսյանը թափահարեց ձեռքը, իսկ այդ պահին դահլիճից հեռացող կորեացիներին թվաց, թե նա իրենց ցտեսություն է մաղթում: Ի պատասխան կորեացիներն էլ սկսեցին թափահարել ձեռքերը:

Իրավիճակը փրկեց Հովիկ Աբրահամյանը, ով նույնպես սկսեց թափահարել ձեռքը` good bye, good bye ասելով: Պատգամավորները սկսեցին ծիծաղել:

Այնուհանդերձ,  Վահան Հովհաննիսյանը հայտարարեց,  որ ՀՅԴ-ն ձեռնպահ է քվեարկելու «Հավաքների ազատության մասին» օրինագծի առաջին ընթերցմանը, քանի որ առաջարկներ է ներկայացրել և սպասում է դրանց ճակատագրին:

 Հովիկ Աբրահամյանը, որի «ուրախ տրամադրությունը» շարունակվում էր, արձագանքեց. «Միգուցե կողմը ճի՞շտ կլիներ»: Կատակեց նաեւ Վահան Հովհաննիսյանը. «Գուցե ճիշտ կլիներ, բայց արդեն ասել եմ»:

Տեսանյութը կարող եք դիտել այստեղ: