Ըստ Ադիբեկյանի` էպատաժ եւ պայքարի ձեւ

«Ժառանգության» առաջնորդ Րաֆֆի Հովհաննիսյանի արարքը, «Սոցիոմետր» սոցիոլոգիական կենտրոնի տնօրեն Ահարոն Ադիբեկյանի բնորոշմամբ, էպատաժ է եւ պայքարի ձեւ` բողոքավոր ընտրազանգվածի ձայները ստանալու համար:

Ադիբեկյանի խոսքերով` փողոցային ժողովրդավարության հարթակը ՀԱԿ-ն արդեն սեփականաշնորհել է, եւ այնտեղ հայտնվողը դժվար թե կարողանա նրա նման մեծ ազդեցություն ունենալ, խորհրդարանական հարթակում էլ «Ժառանգությանը» ոչինչ չի փայլում, քանի որ այնտեղ ավելի հաջող են հանդես գալիս ՀՅԴ-ն եւ ՀՀԿ-ն:

Սոցիոլոգի դիտարկումներով` ամեն մի քաղաքական ուժ պետք է ունենա ռեսուրս, որը կա'մ ժառանգել է, կա'մ ստեղծել, եւ կարողանա այդ ռեսուրսն օպտիմալ օգտագործել: «Ժառանգություն» կուսակցության միակ ժառանգությունը, նրա կարծիքով, Րաֆֆի Հովհաննիսյանն է` իր անձնական վարկանիշով, որը վերջին տարիներին բավականին բարձր է եղել:

«Նկատի ունենալով, որ մինչեւ ընտրությունը մեկ տարի կա, հարց է ծագում` այս տրամաբանությամբ 7-8 ամիս հետո նա ինչի՞ պետք է դիմի, որ իր կողմը գրավի ընդդիմադիր բողոքավոր էլեկտորատին»,- նշեց Ադիբեկյանը` չբացառելով, որ Րաֆֆի Հովհաննիսյանը մեր քաղաքական կուլտուրա գուցե մտցնի ինքնահրկիզման կամ քաղաքական հարակիրիի արարողակարգը:

«Մեր քաղաքական կուլտուրան հարստացավ ինչ-որ նոր բանով, որը մենք պետք է անցնենք որպես քերականական դաս, եւ որոշենք, թե այդ դասից հետագայում ի՞նչ պտուղներ կարող ենք քաղել»,- խոսքը եզրափակեց Ադիբեկյանը: