Ծառուկյանին խորհուրդ է տալիս

Հանրապետականը երբեք եթե-ներով չի խոսել ոչ «Բարգավաճ Հայաստան»-ի իր գործընկերների, ոչ էլ ԲՀԿ նախագահի մասին եւ նույնը խորհուրդ է տալիս նաեւ պարոն Ծառուկյանին. լրագրողների խնդրանքով մեկնաբանելով ԲՀԿ առաջնորդ Գագիկ Ծառուկյանի`«Եթե Ռոբերտ Քոչարյանը ցանկանար` վաղուց կլիներ կա´մ Հանրապետական կուսակցության պատվավոր նախագահ, կա´մ նախագահ» հայտարարությունը ` ասել է ՀՀԿ մամուլի խոսնակ Էդուարդ Շարմազանովը:

«Չեմ կարծում, որ կառուցողական դաշտից են հրապարակային մտորումներն այն մասին, թե անցյալում ով կարող էր լինել գործընկեր կուսակցության նախագահ: Հանրապետականը երբեք եթե-ներով չի խոսել ոչ «Բարգավաճ Հայաստան»-ի մեր գործընկերների, ոչ էլ պարոն Ծառուկյանի մասին, եւ փոխադարձության սկզբունքով նույն բանը խորհուրդ կտայի նաեւ պրն Ծառուկյանին»,- նշել է նա:

Շարմազանովի խոսքերով` ապագան բոլոր հարցերին սպառիչ պատասխան կտա: Իսկ հանրապետականի համար ապագան, ըստ նրա, շատ պարզ ու հստակ է. «Մենք վճռական ենք առաջ շարժվել նախագահ Սարգսյանի գլխավորությամբ»,- հայտարարել է ՀՀԿ խոսնակը: