ՌԴ արտգործնախարարությունում կոշտ են պատասխանել ԵՄ պատժամիջոցների 20-րդ փաթեթին

Մոսկվան կոշտ արձագանք կտա Եվրամիության պատժամիջոցների 20-րդ փաթեթին. այդ պատասխանը կմշակվի Ռուսաստանի շահերին համապատասխան: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան։

«Մենք կձեռնարկենք նաև պատասխան միջոցներ։ Դրանք կլինեն կոշտ։ Դրանք կմշակվեն և կիրագործվեն մեր շահերին համապատասխան», - ասել է նա ճեպազրույցի ընթացքում։

Ապրիլի 23-ին Եվրոպական միությունը պաշտոնապես հաստատել է Ուկրաինային 90 մլրդ եվրո վարկի տրամադրումը և Ռուսաստանի նկատմամբ պատժամիջոցների հերթական՝ 20-րդ փաթեթի ընդունումը: Նոր պատժամիջոցների ցանկում ներառվել է 46 լցանավ, 60 ընկերություն, 117 ֆիզիկական անձ:

Ապրիլի 22-ին Կիևին 90 միլիարդ եվրո վարկի տրամադրմանը և Ռուսաստանի դեմ պատժամիջոցների 20-րդ փաթեթին հավանություն էին տվել Եվրամիության դեսպանները: Դա տեղի էր ունեցել այն բանից հետո, երբ Ուկրաինան վերսկսել էր «Դրուժբա» խողովակաշարով ռուսական նավթի մատակարարումը, և Հունգարիան հանել էր իր վետոն։