Իրանը Լիբանանը չէ, հրադադարի ցանկացած խախտում պատասխան կստանա․ Իրանի դեսպան

«Ներկայումս, գտնվելով հարձակումների դադարեցման փուլում, Իրանը գնահատում է ագրեսիայի պատճառած վնասը»: Այս մասին մամուլի ասուլիսում հայտարարեց Հայաստանում Իրանի դեսպան Մեհդի Սոբհանին:

Նրա խոսքով՝ Իրանի արտաքին գործերի նախարարությունում ստեղծվել է իրավաբանների խումբ, որը նույնպես գնահատում է վնասն իրավական տեսանկյունից: Սոբհանին ընդգծել է Իրանի մտադրությունը՝ դիմել միջազգային կառույցներին՝ ագրեսորների կողմից պատճառված վնասի փոխհատուցման պահանջով:

Հիշեցնենք, որ հունիսի 12-ին՝ Միացյալ Նահանգների հետ դիվանագիտական ​​շփումների ընթացքում, Իրանը հարձակման ենթարկվեց Իսրայելի կողմից, որն իր գործողությունները հիմնավորեց կանխարգելիչ հարվածի անհրաժեշտությամբ: Հետագայում հակամարտությանը միացավ նաև Միացյալ Նահանգները՝ հարվածելով Իրանի տարածքում գտնվող մի շարք թիրախների: Ի պատասխան՝ Թեհրանը հարձակվեց տարածաշրջանի ամենամեծ ամերիկյան ռազմաբազաներից մեկի վրա: Հարվածների փոխանակումից հետո կողմերը դադարեցրին ակտիվ գործողությունները, ինչը, ըստ էության, հանգեցրեց հրադադարի: