Հովիկ Աբրահամյանը և այլ պաշտոնատար անձինք հրավիրվել են Քննչական կոմիտե

Հրազդանի անտառային ֆոնդի հողերի սեփականաշնորհման ընթացքում հայտնաբերված ենթադրյալ կոռուպցիոն դրսևորումների վերաբերյալ քրեական գործի շրջանակներում նյութերի նախապատրաստման փուլում հրավիրվել են բացատրություն տալու մի շարք պաշտոնատար անձինք, որոնց թվում` նաև նախկին վարչապետ Հովիկ Աբրահամյանը, Կոտայքի նախկին մարզպետ Կովալենկո Շահգելդյանը, «Հայանտառ» ՊՈԱԿ-ի նախկին տնօրեն Մարտուն Մաթևոսյանը: Yerkir.am-ի հետ զրույցում տեղեկությունը հայտնեց Քննչական կոմիտեի նախագահի խորհրդական Սոնա Տռուզյանը։

Ավելի վաղ հայտնել էինք, որ ՀՀ քննչական կոմիտեի` հատկապես կարևոր գործերի քննության գլխավոր վարչությունում հարուցվել է քրեական գործ՝ անտառային ֆոնդի հողերից ավելի քան 50 հեկտար հողատարածքի սեփականաշնորհման ընթացքում պաշտոնատար անձանց կողմից պաշտոնեական դիրքը չարաշահելու դեպքի առթիվ։