Նոյեմբերի 9-ից հետո սա արդեն երրորդ լայնամասշտաբ հարձակումն է՝ բնակավայրերի ուղղությամբ․ Առաքել Մարտիկյան

2020թ-ի  նոյեմբեր ամսին  ստորագրված փաստաթղթից հետո սա արդեն երրորդ լայնամասշտաբ հարձակումն է՝ բնակավայրերի ուղղությամբ։ Ադրբեջանի ռազմաքաղաքական ղեկավարությունը բազմիցս պնդում է, որ  նախահարձակ են եղել, իբրև կասեցնելու հայկական  ԶՈւ-ին։ Որպես ԶՈւ ԳՇ պետի տեղակալ պաշտոնապես հայտարարում եմ, որ հայկական ԶՈւ-ի կողմից ոչ մի նման բան չնախատեսված չի եղել, քանի որ դա հակասում է մեր ռազմաքաղաքական ղեկավարության հրամաններին։ Այս մասին Սյունիք այցելած Հայաստանում հավատարմագրված դեսպանների հետ հանդիպման ընթացքում  ասաց ԳՇ պետի տեղակալ Առաքել Մարտիկյանը։

Նրա խոսքով՝ այսօր օրվա ընթացքում հայ-ադրբեջանական շփման գծում իրավիճակը եղել է համեմատաբար հանգիստ, բացառությամբ կրակի ռեժիմի մի քանի խախտումների։

«Վերջին խոշոր խախտումը եղել է երեկ առավոտյան` Ջերմուկի շրջանում։ Ադրբեջանի զինված ուժերը կիրառել են 82 միլիմետրանոց ականանետ և ԱԹՍ-ներ, որոնց հետևանքով զոհեր ենք ունեցել»,- ասաց Մարտիկյանը։