ԱՄՆ-ը պատրաստվում է նոր սցենարների Իրանի հետ երկխոսության լճացման պայմաններում. Պետքարտուղարություն

Վիեննայում Իրանի հետ ընթացող բանակցությունների արդյունքը մնում է անորոշ։ Վաշինգտոնը պատրաստվում է մի սցենարի, երբ Թեհրանի միջուկային ծրագրի շուրջ համաձայնություն չի լինի։ Այս մասին ճեպազրույցում հայտարարել է ԱՄՆ պետդեպարտամենտի խոսնակ Նեդ Փրայսը` մեկնաբանելով ԱՄՆ-ի վերադարձը Իրանի միջուկային ծրագրի գործողությունների համատեղ համապարփակ ծրագրի պայմաններին։

«Ճշմարտությունն այն է, որ մենք զգալի առաջընթաց ենք գրանցել Վիեննայում 5 + 1 ձևաչափով (ՄԱԿ-ի հինգ մշտական անդամներ և Գերմանիա) բանակցություններում վերջին ամիսներին, բայց, իհարկե, մենք չենք կարողացել վերջնական տեսքի բերել պայմանավորվածությունները, և պարզ չէ՝ արդյո՞ք մենք կարող ենք դա անել, դեռ ամեն ինչ անորոշ է»,- ասել է դիվանագետը։

Փրայսը ուշադրություն է հրավիրել Իրանի հարցով ԱՄՆ եվրոպական դաշնակիցների հետ շարունակվող քննարկումներին։ Ըստ նրա՝ քանի որ JCPOA-ին վերադարձը դեռ հարցականի տակ է, ԱՄՆ-ը պատրաստ է երկու սցենարի՝ պայմանավորվածություններով և առանց։

«Դաշնակիցների և գործընկերների հետ Վաշինգտոնը պատրաստվում է մի սցենարի, որում բացակայում է JCPOA-ն, և ստիպված կլինի դիմել այլ մարտավարությունների և մոտեցումների, որոնք կծառայեն մեր շահերին։ Նախագահ Բայդենը հասկացրել է, որ Իրանին կտրականապես թույլ չի տրվի միջուկային զենք ձեռք բերել՝ անկախ նրանից` JCPOA կա, թե` ոչ»,- պարզաբանել է Փրայսը: