Զարթօնքի ջահակիրները...

Ապրիլի 23-ի երեւանեան հզօր ՋԱՀԵՐՈՎ ԵՐԹ-ը փաստօրէն ապացուցեց, որ Հայաստանի ժողովրդական լայն խաւերը պահանջատէր են նաեւ առ այն, որ իշխանութիւնը-յատկապէս անձնատուր իշխանութիւնը- որեւէ կերպ բարոյական, քաղաքական եւ իրաւական մանդատ չունի՝ յանուն թուրքական «խաղաղութեա՜ն» ու այսպէս ասած՝ հաշտութեան սուտ ու կեղծ պատգամների, նոր վտանգների ենթարկի ողջ հայութեան առանց այն էլ վտանգւած ու խոցւած ազգային-պետական շահերը…

Ջահերով երթի անմիջական ականատեսների շարքում էին այսպէս ասած՝ միջազգային ընտանիքը ներկայացնող ԱՄՆ-ի, Եւրոմիութեան եւ այս վերջնից «BREXIT» եղած Անգլոսաքսոնական դեսպանները՝ Երեւանում…, որոնք հաստատապէս անտես են ձեւանալու տասնեակ հազարաւորների բազմանշանակ ԵՐԹ-ը ու տւեալ դէպքում չեն էլ աճապարելու հարցազրոյցներ տալ իշխանամերձ լրատւականներ՝ Հ1-ին ու «Ազատութիւն» կայաններին՝ իրենց ձեռնտու՝ հաշտւողական-կամազուրկ Հայաստանը որպէս «Ժողովրդավարութեան բաստիոն» (ամրոց) գովազդել-գովերգելու համար…

Կը լռեն այնպէս, ինչպէս լռեցին ու աչք փակեցին 44-օրեայի ընթացքում թուրք-ադրբեջանական պատերազմական յանցագործութիւններով ուղեկցւած ոճրագործութիւնների առջեւ:

Ինչեւէ, սրանք ու սրանց երեւանեան ապազգային արբանեակներն դեռ շատ նորոյթների են ականատես լինելու. Հոգ չէ, որ կրկին լռելու են տեսածների մասին։

Կարեւորը, որ ապրիլի 23-ի ջահերով երթին յաջորդող՝ ժողովրդական դիմադրական թափ առնող շարժումը ստիպելու է նոյն այդ «միջազգային ընտանիքի» ինչպէս երբեւէ բարոյալքւած անդամներին, հաշւի նստել Հայաստանի, Արցախի եւ Սփիւռքի համազգային կամք դրսեւորող Զարթօնքի ջահակիրների պահանջատիրութեան հետ, որն գնալով աւելի է կոփւում ու ընդլայնւում՝ յանուն ա՛յն հերոս նահատակների սրբացւած արեան, որով էլ երաշխաւորւելու է Հայաստան աշխարհի արժանապատիւ ապագան ու Հայոց Պետականութեան անսասանութիւնը…:

ԴԵՐԵՆԻԿ ՄԵԼԻՔԵԱՆ

 «ԱԼԻՔ» ՕՐԱԹԵՐԹԻ ԳԼԽԱՒՈՐ ԽՄԲԱԳԻՐ