Այսօր նայում են ոչ թե գործի նյութերին, այլ նրան, թե որ դատավորին է մակագրվել գործը, և արդեն հայտնի է ելքը. Արթուր Սարգսյան

Դատավորի այս որոշմանը ես սպասում էի, վստահ էի, որ դատավոր Ռուբիկ Մխիթարյանը մերժելու է Առուշ Առուշանյանի խափանման միջոց կալանքը փոխելու միջնորդությունը, որովհետեւ նույն դատավորը երկու օր առաջ մերժեց եւ կալանավորեց Քաջարան համայնքի ղեկավար Մանվել Փարամազյանին: Այս մասին, այսօր՝ փետրվարի 9-ին, Վերաքննիչ քրեական դատարանի մոտ լրագրողների հետ զրույցում նշեց ԱԺ «Հայաստան» խմբակցության պատգամավոր Արթուր Սարգսյանը՝ անդրադառնալով Գորիսի համայնքապետ Առուշ Առուշանյանի կալանքը չփոխելու որոշմանը:

«Այսօր Հայաստանում մի կարծիք է ձեւավորված, որ ոչ թե նայում են գործի նյութերին, այլ նայում են, թե որ դատավորին է մակագրված գործը, դրանից արդեն հասարակությանը պարզ է դառնում, որ կալանավորվելու է: Երբ գործերը մակագրվեց այս դատավորին, բոլորս համոզված էինք, որ Մանվել  Փարամազյանն ու Առուշ Առուշանյանը կալանավորվելու են: Ես վստահաբար ասում եմ, որ սրանք քաղաքական հետապնդումներ են: Եթե գործն ուսումնասիրեք, կհամոզվեք, որ դրանում ոչինչ չկա»,-ասաց նա:

Նշենք, որ այսօր՝ փետրվարի 8-ին, Վերաքննիչ քրեական դատարանը հրապարակեց վճիռը՝  չբավարարելով Առուշ Առուշանյանի խափանման միջոց կալանքը գրավով փոխարինելու միջնորդությունը մերժելու վերաբերյալ ընդհանուր իրավասության դատարանի որոշման դեմ բերած պաշտպանների բողոքը։

Ավելի վաղ հայտնել էինք, որ Գորիսի համայնքապետ Առուշ Առուշանյանը մեղադրվում է համայնքի ընտրողներից առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով, ԱԺ արտահերթ ընտրությունների (որին ինքը մասնակցում էր «Հայաստան» դաշինքի ընտրական ցուցակով) նախընտրական քարոզարշավի ընթացքում ուղղակի դիտավորությամբ ծանր հանցագործություն նախապատրաստելու, այն է` ընտրություններին մասնակցելու եւ «Հայաստան» դաշինքի օգտին կողմ քվեարկելու համար երկու կամ ավելի ընտրողի կաշառք տալու մեջ՝ ՀՀ ՔՕ 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով եւ 38-154.2-րդ հոդվածի 3-րդ մասով:

Բացի այդ, ըստ մեղադրանքի, Առուշ Առուշանյանը Գորիս համայնքի Քարահունջ բնակավայրի վարչական ղեկավար Լուսինե Ավետյանի միջոցով կազմակերպել է նույն բնակավայրի ընտրողներին 2021 թվականի հունիսի 20-ին նշանակված ԱԺ արտահերթ ընտրություններին մասնակցելուն եւ «Հայաստան» դաշինքի օգտին կողմ քվեարկելուն հարկադրելը:

Առուշանյանն իրեն առաջադրված մեղադրանքը չի ընդունում։ Նրա պաշտպաններն էլ այդ քրեական գործերը որակում են որպես քաղաքական հետապնդում Առուշանյանի նկատմամբ։