ԲԴԽ 9 անդամների մոտ հարց չի առաջանո՞ւմ՝ ինչու են դատավոր Բախշիյանին հիշել հենց հիմա․ Վարդևանյան

Նույնիսկ Խորհրդային Միության ռեպրեսիաների ժամանակ սովետական իշխանությունից երբեք չէիք լսի, որ ռեպրեսիաներ են իրականացնում, բայց բոլորը հասկանում էին, որ իրականացվում են ռեպրեսիաներ: Սա այդ դեպքերից մեկն է: Ցավով պետք է նշեմ, որ ԲԴԽ-ն, որը Սահմանադրությամբ օժտված է այնպիսի կարգավիճակով, որ պաշտպանի դատավորներին, երաշխավորի դատավորների անկախությունը, իրականում հակառակն է անում: Միաձայն որոշել է, որ դատավորին թող հետապնդեն, թող տանեն, կալանավորեն, բայց նույն ԲԴԽ 9 անդամների մոտ  հարց չի առաջանո՞ւմ, որ դատավոր Բորիս Բախշիյանին հիշել են հենց հիմա: Այս մասին այսօր՝ փետրվարի 1-ին, ԱԺ-ում լրագրողների հետ զրույցում նշեց ԱԺ «Հայաստան» խմբակցության պատգամավոր Արամ Վարդևանյանը:

«Ցանկացած անաչառ դիտորդ, եթե այս ամենը տեսնի, կարո՞ղ է ենթադրել կամ համոզված լինել, որ այստեղ ոչ մի պատահականություն չկա: Այն, որ հիմա են հետապնդում սկսել, բացառապես պայմանավորված է նրանով, որ կոնկրետ այս դատավորը վերջին ժամանակահատվածում ցուցաբերել է իրական անկախություն: Կարծես, Աշոտ Երկաթի գործը համբերության բաժակը լցվելու փուլն էր»,- ասաց նա: