ՏԵՍԱՆՅՈՒԹ․ ՀՅԴ Հայ դատի նման ժողովները Ստեփանակերտում անցկացնելն Արցախում բնակվողի համար հույսի շող է․ Հակոբ Հակոբյան

Տասնամյակներ շարունակ Հայ Յեղափոխական Դաշնակցությունը, իր աշխարհասփյուռ կառույցները, Հայ Դատի գրասենյակներն անգնահատելի աշխատանք են կատարել Հայոց Ցեղասպանության ճանաչման, Արցախի հանրապետության իրավունքների պաշտպանության և ցանկացած համահայկական նշանակության հարցերում՝ ըստ Yerkir.am-ի ասաց Արցախի «Արդարություն» կուսակցության համանախագահ Հակոբ Հակոբյանը, որը Ստեփանակերտում մասնակցում է ՀՅԴ Հայ դատի գրասենյակների և հանձնախմբերի խորհրդաժողովին:

«Այսօր մենք Արցախում խնդիր ունենք խոսելու հայի ապրելու իրավունքի մասին, ուստի նմանատիպ հանդիպումները, ժողովները Ստեփանակերտում անցկացնելն Արցախում բնակվողի համար մի հույսի շող է, որ ամեն ինչ վերջացած չէ: Ուստի ես «Արդարություն» կուսակցության անունից շնորհակալություն եմ հայտնում, որ մենք նույնպես մասնակցում ենք այս միջոցառմանը, ցանկանում եմ բարեբեր աշխատանքներ և նմանատիպ գործողությունների շարունակականություն»,-ասաց Հակոբ Հակոբյանը։

Նշենք, որ ՀՅԴ Հայ դատի հանձնախմբերի և գրասենյակների անդամները Երևանում, Գորիսում և Ստեփանակերտում մասնակցում են 5-օրյա խորհրդաժողովի։ Հայ դատն աշխարհով մեկ առաջ տանող գործիչները խորհրդաժողովի 3 հանգրվաններում խիստ հագեցած օրակարգով զեկույցներով հանդես եկան, ներկայացրին ստեղծված մարտահրավերներին դիմակայելու իրենց առաջարկները, հանդիպեցին պետական առանցքային պաշտոնյաների հետ՝ առաջին ձեռքից տեղեկանալու խնդիրներին և հստակեցնելու իրենց անելիքը։

Աննա Բալյան

Մանրամասն՝ տեսանյութում․