Մեծ Բրիտանիան մշտական հիմունքներով երկու ռազմանավ կտեղակայի Ասիայի ջրերում

Մեծ Բրիտանիան մշտական հիմունքներով երկու ռազմանավ կտեղակայի Ասիայի ջրերում այն բանից հետո, երբ նրա «Թագուհի Եղիսաբեթ» ավիակիրը եւ ուղեկցող նավերը Ճապոնիա կմեկնեն, հայտնում է Reuters-ը:

«Հարվածային խմբի առաջին տեղակայումից հետո, այս տարվա վերջից Միացյալ Թագավորությունը մշտապես երկու նավ կուղարկի տարածաշրջան»,- ճապոնացի իր գործընկեր Նոբուո Կիշիի հետ համատեղ հայտարարությունում ասել է Մեծ Բրիտանիայի պաշտպանության նախարար Բեն Ուոլեսը:

Ճապոնիա հասնելուն պես «Թագուհի Եղիսաբեթը» եւ նրան ուղեկցող նավերը կբաժանվեն ԱՄՆ-ի եւ Ճապոնիայի ռազմածովային կայաններում նավահանգիստներ առանձին մուտք գործելու համար:

Լինելով ԱՄՆ-ի մերձավոր դաշնակիցը՝ Ճապոնիան ԱՄՆ ռազմական ուժերի ամենամեծ կենտրոնացման վայրն է:

F-35B անտեսանելի կործանիչներ տեղափոխող բրիտանական ավիակիրը կանգ կառնի Յոկոսուկայում, որտեղ գտնվում են ճապոնական ռազմածովային ուժերի հրամանատարությունը եւ ԱՄՆ-ի «Ռոնալդ Ռեյգան» ռազմանավը:

Բրիտանական նավերը մշտական բազա չեն ունենա, հայտարարել է Տոկիոյում Մեծ Բրիտանիայի դեսպանատան ներկայացուցիչը:

«Թագուհի Եղիսաբեթ» նավին ուղեկցում են ԱՄՆ-ից եւ Նիդեռլանդներից երկու կործանիչներ, երկու ֆրեգատներ, երկու օժանդակ նավեր՝ ԱՄՆ-ից եւ Նիդեռլանդներից: Այն Ճապոնիա կժամանի Հարավչինական ծովով:

Մեծ Բրիտանիայի տարածաշրջանային աճող ներգրավվածության մեկ այլ նշան է այն, որ երկիրը, ի վերջո, կտեղակայի նաեւ Littoral Response Group-ը՝ ծովային հետեւակայինների ստորաբաժանումը, որը պատրաստված է առաքելություններ իրականացնելու համար, ներառյալ տարհանման եւ հակաահաբեկչական գործողությունները: