Հաքերները հարձակվել են Դեղամիջոցների եվրոպական գործակալության վրա, գողացվել են պատվաստանյութերի մասին տվյալներ

Դեղամիջոցների եվրոպական գործակալությունը (EMA), որը ներկայումս ուսումնասիրում է կորոնավիրուսի դեմ արտակարգ պատվաստումների հայտերը, ենթարկվել է հաքերային գրոհի: Pfizer-ը եւ BioNTech-ը հաղորդել են, որ գողացել են իրենց կողմից մշակված կորոնավիրուսային պատվաստանյութի հետ կապված փաստաթղթերը: EMA-ի մամլո հաղորդագրության մեջ չի նշվում, թե երբ է տեղի ունեցել հարձակումը, եւ ինչ տվյալներ կարող էին գողացվել, հաղորդում է RFI-ը:

Դեղամիջոցների եվրոպական գործակալությունը ներկայումս գնահատում է պատվաստանյութերը, որը մշակվել է Pfizer-ի եւ BioNTech-ի դաշինքի եւ Moderna-ի կողմից` ԵՄ-ում դրանց օգտագործմանը արտակարգ հավանություն տալու համար:

BioNTech կայքում տեղադրված հայտարարության մեջ ասվում է, թե EMA-ն իրենց տեղեկացրել է, որ հաքերները ապօրինի հասանելիություն են ստացել Pfizer-ի եւ BioNTech-ի պատվաստանյութի հաստատման հետ կապված որոշ փաստաթղթերին: Նշվում է, որ այս միջադեպի հետ կապված Pfizer-ի եւ BioNTech-ի ոչ մի համակարգ չեն կոտրել: Ընկերությունում չգիտեն՝ արդյո՞ք հարձակվողները կլինիկական փորձարկման մասնակիցների մասին անձնական տվյալներ են ձեռք բերել: Pfizer-ը նաեւ հաստատել է, որ եվրոպական կարգավորող մարմին ներկայացրած որոշ փաստաթղթեր գողացել են, հաղորդում է Bloomberg-ը:

Եվրոպական գործակալությունը պատվաստանյութեր մշակողներին վստահեցրել է, որ հաքերային հարձակումը չի ազդի նրանց հայտի ժամկետի վրա: Ընկերություններն իրենք EMA-ից սպասում են կիբեռհարձակման մասին լրացուցիչ տեղեկատվության:

Դեռ հայտնի չէ, թե առնչվել է արդյոք կիբեռհարձակումը Moderna-ի պատվաստանյութի փաստաթղթերին:

Pfizer-ի եւ BioNTech-ի դեղամիջոցն արդեն հաստատվել է Մեծ Բրիտանիայում, որտեղ երեքշաբթի սկսվել են համընդհանուր պատվաստումները: Եվրամիությունն արդեն պատվիրել է Pfizer-ի եւ BioNTech-ի 300 միլիոն դոզա եւ Moderna-ի 160 միլիոն դոզա պատվաստանյութ: EMA-ն գնահատում է նաեւ այն պատվաստանյութը, որը մշակվել է AstraZeneca-ի կողմից` Օքսֆորդի համալսարանի հետ համատեղ:

Դեռ հայտնի չէ, թե ով է կանգնած Դեղամիջոցների եվրոպական գործակալության վրա հաքերային հարձակման հետեւում: Համավարակի ընթացքում առողջապահական հաստատությունների եւ բժշկական կազմակերպությունների դեմ կիբեռհարձակումները հաճախացել են: Համապատասխան տեղեկությունները որոնվում են կբեռհանցագործների՝ ինչպես անհատ հաքերների, այնպես էլ պետության կողմից աջակցվող հետախուզական ծառայությունների կողմից: