Ռուսաստանի ԱԳՆ–ն համաշխարհային հանրությանը կոչ է արել լրջորեն զբաղվել Աֆղանստանում ահաբեկչության դեմ պայքարով

Ժամանակն է, որ միջազգային հանրությունը լրջորեն վերաբերվի Աֆղանստանում ահաբեկչական սպառնալիքի դեմ պայքարին, առաջին հերթին՝ «Իսլամական պետություն» ահաբեկչական խմբավորման: Այս մասին ասվում է երեքշաբթի ՌԴ ԱԳՆ-ի տարածած մեկնաբանության մեջ՝ կապված Քաբուլի համալսարանի տարածքում տեղի ունեցած ահաբեկչության հետ:

«Մենք կարծում ենք, որ եկել է ժամանակը, որ միջազգային հանրությունը սկսի զբաղվել Աֆղանստանում ահաբեկչական սպառնալիքի դեմ պայքարով, առաջին հերթին՝ ԴԱԻՇ խմբավորումով (ԻՊ նախկին անվանումը), որը հիմնական ապակայունացնող գործոնն է ոչ միայն Աֆղանստանի Իսլամական Հանրապետությունում, այլև ամբողջ աշխարհում»,– նշված է հայտարարության մեջ։

ԱԳՆ-ն նաև կոչ է արել Աֆղանստանի կառավարությանը և օտարերկրյա ռազմական զորակազմի ղեկավարությանը՝ «գտնել և պատժել հանցագործներին, որոնք կազմակերպել են այս անմարդկային ահաբեկչությունը»:

Երկուշաբթի Քաբուլում գտնվող համալսարանի տարածքում տեղի էր ունեցել պայթյուն, որից հետո մի խումբ զինված մարդիկ սկսել էին կրակել համալսարանի իրավաբանական դպրոցի մոտակայքում: Աֆղանստանի հատուկ նշանակության ջոկատներն ուղարկվել էին համալսարան: Անվտանգության ուժերին հաջողվել էր տարհանել դեպքի վայրում եղած հարյուրավոր մարդկանց: Հարձակվողներից երեքը սպանվել էին: