Շվեյցարացի օդաչուն կատարել է արևային մարտկոցներով աշխատող ինքնաթիռից աշխարհում առաջին ցատկը

Շվեյցարացի ինժեներ և օդաչու Ռաֆայել Դոմժանը «SolarStratos» արևային մարտկոցներով աշխատող ինքնաթիռից առաջին ցակտն է կատարել աշխարհում: Այս մասին հայտնում է SWI-ն:

Շվեյցարիայի ժամանակով 07:40-ին SolarStratos ինքնաթիռն օդ է բարձրացել Պիերն քաղաքում գտնվող օդանավակայանից՝ երկու ուղևորներով՝ փորձարկող օդաչու Միգել Իտուրմենդի և երկրորդ օդաչու, ինժեներ և գիտնական Ռաֆայել Դոմժանի հետ:

Մոտ 1538մ բարձրության վրա Ռաֆայել Դոմժանն արևային մարտկոցներով աշխատող ինքնաթիռից առաջին ցատկն է կատարել աշխարհում:

Նա կարողացել է ժամանակին բացել իր պարաշյուտը և վերադառնալ Պիերնի օդանավակայան, որտեղ նրան ողջունել է շվեյցարացի օդաչու Բերտրան Պիկկարը, որը 2016 թվականին շուրջերկրյա ճանապարհորդություն է կատարել Solar Impulse արևային ինքնաթիռով:

SolarStratos ինքնաթիռն ունի 8,5 մետր երկարություն և 24,8 մետր թևերի բացվածք: Այն կշռում է 450 կգ: