ՏԵՍԱՆՅՈՒԹ․ «Վանաձոր» քրեակատարողականում հացադուլ է, «Արմավիրում»՝ հրաժարվում են քրեակատարողականի սնունդից․ ԲՀԿ պատգամավորների ահազանգը

«Վանաձոր» ՔԿՀ-ում 20 անձ հացադուլ է անում՝ կապված դատավարական գործընթացների երկարաձգման խնդրի հետ․ ըստ Yerkir.am-ի ասաց ՀՀ ԱԺ ԲՀԿ խմբակցության պատգամավոր Գևորգ Պետրոսյանը ԱԺ արտահերթ նիստում։

«Ես որպես իրավաբան հայտարարում եմ, որ ՀՀ Սահմանադրության համաձայն՝ մարդու կյանքը և առողջությունը բացարձակ իրավունքներ են և ենթակա չեն սահմանափակման անկախ նրանից՝ ազատության  մեջ է, թե անազատության»,-հայտարարեց նա։

Գևորգ Պետրոսյանը իրավասու մարմինների կողմից արագ արձագանք պահանջեց՝ առավել ևս հաշվի առնելով, որ խոսքը այն անձանց մասին է, ովքեր ոչ թե դատապարտյալ են, այլ մեղադրվում են և որոնց ուղեկցում է անմեղության կանխավարկածը։

Նաիրա Զոհրաբյանը վստահեցրեց, որ հացադուլավորներն ավելանալու են, եթե րոպե առաջ քայլեր չձեռնարկվեն։

Նա նաև նշեց, որ «Արմավիր» ՔԿՀ-ի 12 կալանավոր և դատապարտյալ գրավոր դիմել են քրեակատարողականի պետին և հրաժարվում են քրեակատարողականի սնունդից։ Պատճառն այն է, որ հարազատներին թույլ չեն տալիս միրգ և քաղցրավենիք բերել։

«Անհասկանալի է, եթե ծնողներին թույլ չեն տալիս հանձնուքի մեջ հանձնել միրգ և քաղցրավենիք, այդ դեպքում ինչո՞ւ են թույլ տալիս, որ այն կալանավորը, ով ունի քարտ, քրեակատարողականի կողքի բուդկայից նույն միրգը և նույն քաղցրավենիքը առնի։ Այստեղ կա ակնհայտ անհամաչափություն»,-ասաց Նաիրա Զոհրաբյանը։

Մանրամասն՝ տեսանյութում․