Վրաստանում կարգելվի թեթև մարդատար մեքենաների երթևեկությունը

Վրաստանում ապրիլի 17-ից ժամը 12։00-ից մինչև արտակարգ դրության ավարտը` ներառյալ ապրիլի 21-ը, կարգելվի թեթև մարդատար մեքենաների երթևեկությունը։ Նման որոշում ընդունվել է կորոնավիրուսի տարածման դեմ պայքարի Կոորդինացիոն խորհրդի կողմից. այս մասին հայտնում է apsny.ge կայքը։

Որոշումը չի վերաբերվի բեռնափոխադրող մեքենաներին։

«Ցանկանում եմ ընդգծել, որ մթերային խանութները, դեղատները և այլ բոլոր օբյեկտները, որոնք մինչ այս աշխատել են, շարունակելու են գործել, կշարունակվի նաև առաքման ծառայությունների աշխատանքը», - հայտարարել է երկրի վարչապետի խորհրդական Իրակլի Չիկովանին։

Բացի այդ, վաղվանից Վրաստանում բժշկական դիմակների կրումը փակ տարածություններում կդառնա պարտադիր։ Այս որոշման իրականացման պատասխանատվությունը կստանձնեն իրավաբանական անձինք՝ փակ տարածությունների սեփականատերերը։ Կարգադրության խախտման համար սահմանվել է 15 հազար լարի տուգանք։