Պետք է մտածել ԵԱՏՄ տարածքում համավարակի դեմ պայքարի համար ապրանքների մաքսատուրքերի զրոյացման մասին. Պուտին

Ռուսաստանի նախագահ Վլադիմիր Պուտինն առաջարկություն է արել այն մասին, որ անհրաժեշտ է մտածել ԵԱՏՄ տարածքում համավարակի դեմ պայքարի համար անհրաժեշտ ապրանքների մաքսատուրքերի զրոյացման մասին. հայտնում է Yerkir.am-ը՝ ՏԱՍՍ-ին հղումով։ 

Մասնավորապես, ՌԴ նախագահը համաձայնել է համավարակի պայմաններում ԵՏՄ տարածքում ապրանքների տեղափոխման համար «կանաչ միջանցքների» պրակտիկայի ընդլայնման գաղափարի հետ:

Միևնույն ժամանակ Եվրասիական տնտեսական բարձրագույն խորհրդի անդամների` տեսակոնֆերանսի ձեւաչափով աշխատանքային խորհրդակցության ժամանակ, նա հայտարարությամբ է հանդես եկել՝ նշելով, որ կորոնավիրուսի տարածումը դադարեցնելու համար արտակարգ միջոցներ ընդունելու անհրաժեշտություն կա. «Իսկապես արտակարգ միջոցներ են անհրաժեշտ` վարակի տարածումը դադարեցնելու համար», - ասել է Պուտինն ու հավելել, որ համաճարակի դեմ պայքարում չափազանց կարևոր է բոլոր երկրների համագործակցությունը, այդ թվում` ԵԱՏՄ ձևաչափով:

Իր խոսքում նա նաև շեշտել է՝ ՌԴ-ն կշարունակի կորոնավիրուսի դեմ պայքարի փորձի փոխանակումն այլ երկրների հետ։