Արկադի Ղուկասյանի որդին զորացրվել է առանց «ներկայացման»

Ֆեյսբուքյան օգտատեր, Արցախի Շահումյանի շրջանի Նոր Գետաշեն գյուղի «ԱՐԻ ՌԵԶՈՐԹ» ռեստորանի հիմնադիր Արշակ Զաքարյանն, ըստ Yerkir.am-ի,  իր էջում հրապարակել է զինվորների հետ մի լուսանկար, որոնցից մեկը (ձախ կողմում կանգնածը) Արցախի նախկին նախագահ Արկադի Ղուկասյանի որդին է, ով ԱՀ Պաշտպանության բանակում ծառայությունն ավարտել և տուն է գնում:

Փաստենք, որ, ԱՀ նախկին և ներկա նախագահների որդիների՝ ԱՀ զինված ուժերում ծառայելու փաստն ամենևին չի տիրաժավորվել, այս զինվորներին լայն հանրությունը գրեթե դեմքով չի ճանաչել, հասարակության շրջանում այդ իրողությունը չի ներկայացվել որպես արտառոց երևույթ: Կարճ ասած՝ այս տղաները իրենց հազարավոր ծառայակիցների նման ծառայել են գլուխները կախ և որևէ «թատերական ներկայացման» մաս չեն կազմել:
Այնինչ՝ ՀՀ վարչապետի որդու ծառայության փաստը վարչապետին ծառայող պետական և մասնավոր ողջ քարոզչամեքենայի կողմից մերթ ներկայացվում է որպես կարևորագույն զոհաբերություն, մերթ պատմական նվեր հայ ժողովրդին՝ Փաշինյանի ընտանիքի կողմից: