2020 թվականին բոլոր զորամասերում նոր ճաշարաններ կլինեն. Դավիթ Տոնոյան

Արդեն նորացվել, արդիականացվել է ճաշարանների 38-40 տոկոսը. ԱԺ-ում բյուջետային քննարկումների ավարտից հետո լրագրողների հետ ճեպազրույցում, ըստ Yerkir.am-ի, հայտնեց պաշտպանության նախարար Դավիթ Տոնոյանը՝ անդրադառնալով ՀՀ զինված ուժերում կենցաղային պայմանների բարելավման, մասնավորապես՝ ճաշարանների արդիականացման թեմային:

«Մեր առջև դրված պլանն այսպիսին է՝ 2020 թվականին պետք է ավարտենք այդ ուղղությամբ նախաձեռնված բոլոր գործողություններն ու անցնենք սահմանագծին տեղակայված զորամասերի ճաշարանների արդիականացման աշխատանքներին»,- նշեց նախարարը:

Ըստ նրա՝ թեև ՀՀ-ում զինված ուժերը երբեք տեղում չեն դոփել, սակայն զինծառայողների կենցաղի, նյութատեխնիակական ապահովման և սպառազինության բարելավման ուղղությամբ տեմպերը նկատելիորեն արագացել են: Դավիթ Տոնոյանի վստահեցրեց՝  իրականում ՀՀ զինված ուժերում բավականին կարճ ժամանակահատվածում մեծ ծավալով փոփոխություններ են իրականացվել: