Հայերը կկարողանան հեշտացված կարգով ՌԴ-ում ժամանակավոր բնակության թույլտվություն ստանալ

Ռուսաստանում մտադիր են մեղմացնել միգրացիոն օրենսդրությունը և օտարերկացիների ավելի լայն շրջանակի հնարավորություն տալ հեշտացված կարգով ժամանակավոր բնակության և կացության թույլտվություններ ստանալու. հայտնում է Русарминфо-ն:

Ժամանակավոր բնակության թույլտվություն տրամադրելու մասին դիմումների դիտարկման ժամկետը պետք է կրճատվի և դառնա 4 ամիս, իսկ կացության թույլտվությունը տրվում է անժամկետ:

Համապատասխան օրինագիծը պատրաստել է ՌԴ կառավարությունը:

«Առաջարկների համաձայն` ժամանակավոր բնակության թույլտվություն, քվոտայից դուրս, կարող են ստանալ քաղաքացիները, որոնք ծնվել են ՌԴ տարածքում, այնուհետև բնակվել այլ երկրում` փախստականների իրավունքների պաշտպանության և վերաբնակեցման գործընթացի կարգավորման մասին  միջազգային պայմանագրի շրջանակում: Նման պայմանագիր կնքված է Հայաստանի և մի քանի այլ երկրների հետ»,- գրում է ռուսական Парламентская газета-ն:

Նշվում է, որ ՌԴ Պետդուման կդիտարկի օրինագիծը երրորդ ընթերցմամբ`  լիագումար նիստում, որը կմեկնարկի հուլիսի 23-ին:

Известия-ն հայտնում է, որ 2019-ի հունվար-ապրիլ ամիսներին Ռուսաստանի Դաշնության բնակչության միգրացիոն աճը կտրուկ ավելացել է՝ գերազանցելով վերջին 10 տարվա  բոլոր ցուցանիշները: Այդ մասին ասվում է Գայդարի համալսարանի մոնիթորինգում: Ըստ հետազոտության՝ առավել շատ ներգաղթ եղել է Հայաստանից և Ուկրաինայից: Բելառուսից և Մոլդովայից ՌԴ միգրացիոն աճը կտրուկ նվազել է: