Ամառային զորակոչի ընթացքում քաղաքացիների բողոքների քննարկման հանձնաժողով է ստեղծվել

ՀՀ պաշտպանության նախարարի հրամանով` ՀՀ պաշտպանության նախարարին կից հասարակական խորհրդի հովանու ներքո ստեղծվել է 2019թ. ամառային զորակոչի ընթացքում քաղաքացիների դիմումների և բողոքների քննարկման հանձնաժողով:

Նորաստեղծ հանձնաժողովի նախագահ է նշանակվել պաշտպանության նախարարի խորհրդական Գեղամ Հարությունյանը:

Հանձնաժողովը նիստեր կգումարի յուրաքանչյուր երեքշաբթի և ուրբաթ օրերին` ժամը 10:00-ից 18:00-ն, Մոսկովյան 5 հասցեում գտնվող հասարակական խորհրդի աշխատավայրում: Առաջին նիստը տեղի կունենա հունիսի 25-ին:

Հանձնաժողովի նիստերը բաց են լրատվամիջոցների համար:

Ինչ վերաբերում է դիմում-բողոքներին, ապա դրանք ընդունվում են աշխատանքային օրերին` մինչև ժամը 17:00-ն:

Այլ տեղեկատվության համար քաղաքացիների համար գործում է /010/ 52-34-82 քաղաքային հեռախոսահամարը: