Մեծ հաշվով Սերժ Սարգսյանի ցուցմունքները մեզ հետաքրքիր էլ չեն. Ռոբերտ Քոչարյանի պաշտպան

Վերաքննիչ քրեական դատարանում այսօր  մեկնարկել է ՀՀ երկրորդ նախագահ Ռոբերտ Քոչարյանի վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքի քննությունը:

Քիչ առաջ Ռոբերտ Քոչարյանի պաշտպանական խմբի անդամ, փաստաբան Հայկ Ալումյանը լրագրողներին տեղեկացրեց, որ դատարանը հեռացավ խորհրդակցական սենյակ։ Նա նշեց, որ դատարանի որոշումը կհրապարակվի փետրվարի 7-ին, ժամը 12։00-ին:

Նիստի ավարտից հետո Հայկ Ալումյանը շեց, որ տեղի ունեցավ լիարժեք դատավարություն, քննարկվեցին կողմերի բոլոր փաստարկները: Դատարանին հետաքրքրում էր Ռոբերտ Քոչարյանի անձեռնմխելիության վերաբերյալ փաստարկները, թե ինչ է նշանակում այն, որ դադարել են գործել սահմանադրական որոշ նորմեր:

Հարցին, թե ինչպես կմեկնաբանի այն ոչ պաշտոնական տեղեկությունը, թե Մարտի 1-ի գործով հարցաքննվել է Սերժ Սարգսյանը, Հայկ Ալումյանը նշեց.

«Ես տեղյակ չեմ` Սերժ Սարգսյանը հարցաքննվել է, թե ոչ: Մեծ հաշվով դա մեզ հետաքրքիր էլ չէ»: Նրա խոսքով` Սերժ Սարգսյանը, եթե անգամ Մարտի մեկի գործով ցուցմունքներ է ներկայացրել, ապա դրանք Քոչարյանի գործով ներկայացված չեն:

Ալումյանի խոսքով՝ քննիչի կողմից դատարան ներկայացված ցուցմունքներից շատերը տվել են բարձրաստիճան սպաները.

«Կան սպայական կազմից բարձրաստիճան պաշտոնյաներ, ովքեր այս գործով հարցաքննվել են»,- ասաց նա։