ՌԴ ԱԳՆ-ի խիստ պատասխանը` Ադրբեջանի ԱԳՆ-ին

Մոսկվան բացատրությունների է սպասում Բաքվից` հայկական արմատներով ՌԴ քաղաքացիների մուտքը երկիր արգելելու յուրաքանչյուր միջադեպի հետ կապված: Այդ մասին ասվում է ՌԴ ԱԳՆ-ի հայտարարությունում:

Նշվում է, որ ՌԴ ԱԳՆ-ն ծանոթացել է իրենց` համապատասխան հարցով նամակին Ադրբեջանի ԱԳՆ-ի արձագանքին  և մեկնաբանության տոնայնությունը դիվանագիտական պատշաճության շրջանակից դուրս է համարում:

«Ոչ պակաս հարցեր  է առաջացնում մեկնաբանության բովանդակությունը, որի պահանջն է չուռճացնել Ադրբեջան ժամանող ՌԴ քաղաքացիների հանդեպ խտրականության թեման, որն իբր փոքր նշանակություն ունի երկկողմ հարաբերությունների դինամիկ զարգացման ֆոնին»,- ասվում է հայտարարությունում:

Ըստ ՌԴ ԱԳՆ-ի` նման մոտեցումն անընդունելի է:

«Գործի հետ կապ չունեցող մտորումների փոխարեն կցանկանայինք լսել առարկայական բացատրություններ ռուսաստանցիների հետ կապված ցանկացած միջադեպի վերաբերյալ»,- նշվում է հայտարարությունւոմ:

Հայտարարությունում բերվում են որոշ օրինակներ, թե ինչպես են ՌԴ քաղաքացիներին արգելել մուտք գործել Ադրբեջան:

Վերջում նշվում է, որ, ադրբեջանական կողմի բովանդակային արձագանքից կախված, կորոշվեն հետագա քայլերը:

Ադրբեջանն ակնկալում է Ռուսաստանի պաշտոնական ներկայացուցչից, որ նա  մեծացնի ջանքերն իր քաղաքացի Դիլհամ Ասքերովին ազատ արձակելու համար, որ գտնվում է հայերի մոտ «գերության մեջ»: Այդ մասին ասել էր Ադրբեջանի ԱԳՆ պաշտոնական ներկայացուցիչ Լեյլա Աբդուլաևան` մեկնաբանելով ՌԴ ԱԳՆ ղեկավար Սերգեյ Լավրովի` ՌԴ քաղաքացի Մարատ Գալստյանին ՌԴ վերադարձնելու մասին հայտարարությունը:

Հիշեցնենք, որ Լավրովի մեծ մամուլի ասուլիսի ժամանակ «Շանթ»-ի լրագրողը հետաքրքրվեց` ի՞նչ է ձեռնարկում Ռուսաստանն Ադրբեջանում արդեն 2 տարի շինծու մեղադրանքով կալանավորված` ՌԴ քաղաքացի Մարատ Ուելդանով Գալուստյանի արտահանձման հարցով:

Լավրովը պատասխանեց, որ օտար երկրում բարդ իրավիճակում հայտնված ՌԴ քաղաքացիների հարցը մշտապես բարձրացվում է երկկողմ շփումների ժամանակ, և հենց այդ թեման վերջերս քննարկվել է Ադրբեջանի հետ բանակցությունների ժամանակ:

«Հույս ունեմ, որ մենք կկարողանանք երկխոսության և իրավական նորմերի վրա հիմնված որոշումների միջոցով հասնել բոլոր կողմերին ձեռնտու արդյունքի և վերադարձնել հայ քաղաքացուն Ռուսաստան»,- ասաց նա: