Սկրիպալին թունավորելու հրամանը տվել է Պուտինը. Ջոնսոն

Մեծ Բրիտանիայի տարածքում քիմիական զենք կիրառելու հրամանը, ամենայն հավանականությամբ, տվել է ՌԴ նախագահ Վլադիմիր Պուտինը: Այդ մասին հայտարարել է Բրիտանիայի ԱԳՆ ղեկավար Բորիս Ջոնսոնը. հայտնում է Медуза-ն:

«Մենք կարծում ենք, որ հավանական է, որ Բրիտանիայի, Եվրոպայի փողոցներում  նյարդա-պարալիտիկ նյութ կիրառելու հրաման տալը նրա որոշումն է եղել` Երկրորդ համաշխարհայինից ի վեր առաջին անգամ»,- ասել է նա:

Հիշեցնենք, որ մարտի 14-ին Մեծ Բրիտանիայի վարչապետ Թերեզա Մեյը Ռուսաստանին էր մեղադրել ռուս նախկին լրտես Սերգեյ Սկրիպալի թունավորման մեջ և հայտնել  23 ռուսաստանցի դիվանագետների արտաքսման մասին: Պաշտոնական Մոսկվան հերքում է մեղադրանքները և սպառնում պատասխան քայլերով: