Թուրք բժիշկների միության 8 անդամ ձերբակալվել է Աֆրինի գործողությունները քննադատելու պատճառով

Անկարայի գլխավոր հանրապետական դատախազությունը Թուրքիայի ՆԳ նախարարության հայցի հիման վրա հետաքննություն է սկսել Թուրք բժիշկների միության դեմ։

Ըստ Cumhuriyet-ի՝ հայցում պահանջվել է դադարեցնել միության կենտրոնական խորհրդի գործունեությունը, որի անդամները դեմ էին արտահայտվել Սիրիայի Աֆրին քաղաքում Թուրքիայի ԶՈւ-ի կողմից իրականացվող գործողությունների մասին:

Միության 11 անդամ մեղադրվել է «հանրության շրջանում թշնամանք և քեն հրահրելու», «թուրք ազգին, Թուրքիայի Հանրապետությունը, թուրքական պետական կառույցները ստորացնելու», «ահաբեկչական խմբավորումների գործունեությունը քարոզելու» մեջ։ 11 հոգու նկատմամբ  ձերբակալման որոշում է կայացվել, սակայն նրանցից 8-ին է հաջողվել ձերբակալել:

Ոստիկանությունը նաև խուզարկել է միության շենքն ու հիվանդանոցներում այդ բժիշկների աշխատասենյակները։

Բացի այդ` Թուրքիայի առողջապահության նախարար Ահմեթ Դեմիրջանի հրահանգով նախարարության կողմից դատական հայց է ներկայացվել՝ խորհրդի 11 անդամների գործունեության դադարեցնելու պահանջով։